• Register
+ ---

Quick Gun தமிழில் வாசகர்கள் பங்கு பெரும் முதன்மை கேள்வி பதில் களஞ்சியம். உங்களால் உருவாக்கப்பட்டு உங்களால் செயல்படுகிறது. கேள்வி கேளுங்கள். பதில் பெறுங்கள். தெரிந்தவற்றிற்கு பதில் கூறி மற்றவர்களுக்கு உதவுங்கள்.

உங்க ஊர்....

+2 votes

உங்க ஊர் எது? உங்கள் ஊர் பற்றிய சிறு குறிப்பு....?

asked Jul 5, 2013 in பொது by bookworm (4,420 points)
   

9 Answers

+3 votes

திருச்சி ....

ஒரு அழகிய நகரம் ...எங்கள் ஊரில் கோயில் தளங்கள் உள்ளது .அதிலும் பல சிறப்புகளை பெற்ற ஸ்ரீ ரங்கம் ,மலைகோட்டை நிறைய சிறப்பு வாய்ந்தது .
பின் சுற்றுலா இடமான முக்கம்பூர் ,கல்லணை போன்ற வரலாறு பதித்த இடங்களும் உண்டு ,இந்தியாவின் தமிழ்நாடு மாநிலத்தில் அமைந்த எங்க திருச்சி தமிழ்நாட்டின் நடு பகுதியில் அமைந்து உள்ளது . காவிரி ஆற்றங்கரையில் அமைந்துள்ள திருச்சி தமிழகத்தில் உள்ள நான்கு முக்கியமான நகரங்களில் ஒன்றாகும்.திருச்சி இதன் முழு பெயர் திருச்சிராப்பள்ளி .

answered Jul 8, 2013 by தமிழன் (6,854 points)
+5 votes

எங்க ஊற ரெம்ப பிடிக்கும் ( கோணலா இருந்தாலும் என்னோடதாக்கும் விளம்பரம் மாதிரி )

விருதுநகர் தாங்க எங்க ஊரு .. வியாபாரத்துக்கு ரெம்ப பேரு போன ஊருங்க

"பொதிய‌ ஏத்தி வண்டியிலே பொள்ளாச்சி ச‌ந்தையிலே
விருதுந‌க‌ர் வியாபாரிக்கு சின்னகண்ணு
நீயும் வித்து போட்டு ப‌ண‌த்த‌ எண்ணு செல்லக்கண்ணு"

பாட்டே பாடிருக்காங்கான பாத்துக்கொங்கள்ளேன் ..

ரயில்ல போனோம்னா 10 ல இருந்து 10.30 மணி நேரம் ஆகும்க சென்னைல இருந்து .மதுரைக்கு அடுத்த ரயில் நிறுத்தம்க . ரெம்ப பெருமையா எல்லாருக்கும் தெரிஞ்சமாதிரி சொல்லனும்னா கர்மவீரர் காமராஜர் பிறந்த ஊரு எங்க ஊருதான் அப்படின்னு சொல்லிக்குவோம்,

ஆனா அதே காமரஜர அவர சார்ந்த சமூகத்துக்காக உழைக்கவில்லை வாரி வழங்கவில்லைன்னு தோற்கடிச்சதும் இதே ஊர்சனம்தான் ( அத மட்டும் நாங்க புப்ளிசிட்டி பண்ணமாட்டோம் நீங்களும் மனசுக்குள்ளயே வச்சிகோங்க )

குற்றால சீசன் ஆரம்பிச்சா போதும் சீதோசன நிலை சூப்பரா இருக்கும் புனு புனு புனு நு சள்ளடைல மாவு சலிகிரமாதிரி தூறல் விழும் அழகே தனி .

மற்ற நேரம்லாம் வெயில் மண்டைய பிளக்கும்க . அதுனாலதான் நம்ம வசந்த பாலன் டைரக்டர் கூட வெயில்னு ஒரு படம் விருதுநகர்ல வச்சி எடுதாருங்க
சொல்ல மறந்துட்டேனே .. அவரு கூட எங்க ஊருகாரதங்க .

சாப்பாடுல பரோட்டக்கும் , பிரியாணிக்கும் நல்ல பெருபோன ஊருங்க

எங்க ஊரு மாரியம்மன் கோவில் திருவிழா ஏப்ரல் மாசத்துல்ல கொண்டாடுவாங்க ரெம்ப நல்ல இருக்கும் தீச்சட்டி , ரதம் ஏலம் இழுப்பாங்க .

நாம சாமி கும்பிடலனாலும் ஊர்திருவிலாவுக்கு ஊருக்கு போலன அந்த வருசமே வீனா போனமாதிரி ஒரு பீலிங் மனசுக்குள்ளவரும் . அதுக்குகாரணம் அத்தபையனோ , மாமாபையனோ .....( கட் கட் ) அப்படின்னு நினச்சிடாதீங்க திருவிளால அடிக்கிற பறை சத்தம் (கொட்டுதாங்க ) சும்மா ஊரையே தூங்க விடாம சும்மா சுத்தி சுத்தி வரும் . நம்ம பயலுங்க அவளோ அழகா வித விதமா சும்மா சூப்பரா டண்டனுக்க .. டணக்குணக்கா நு .. அயோ அயோ அயோ சூப்பர் போங்க . உங்க காலு உங்க பேச்சை கேட்காம தான ஆடும் .

நன் சொல்லுறது அம்புட்டும் உண்மைங்க பொய்னு நெனச்சா 2014 ஏப்ரலுக்கு பொங்கலுக்கு எங்க ஊருக்கு வாங்க சேர்ந்து ஊரு பொங்கல கொண்டாடிடுவோம்

answered Jul 8, 2013 by premalatha (2,494 points)
edited Jul 8, 2013 by taadmin
+3 votes

மன்னார்குடி ஒரு நகரத்திற்கு சற்றும் குறைவின்றி எல்லா வசதிகளுடன், கிராமிய மணத்துடன் இருக்கும் ஒரு திருவாரூர் மாவட்ட ஊர். என்னதான் திருவாரூர் என்று சொல்லிக்கொண்டாலும் மக்கள் மனதில் இன்னும் தஞ்சாவூர்தான் விருப்பமான ஊர்.

அதிகாலையில் எழுந்துவிடும் ஊர். இன்னமும் மாட்டுவண்டிகளின் ஆதிக்கம் ரோட்டில் அதிகம் இருக்கும்.

எங்கள் ஊரின் அதிசயம் ஸ்ரீ ராஜ கோபாலஸ்வாமி திருகோவில்.

இக்கோவில் ஆயிரம் ஆண்டுகள் பழமை வாய்ந்தது.

மன்னை கிட்டத்தட்ட முக்கிய ஊர்களுக்கு நடுவில் இருக்கின்றது.
இங்கிருந்து முக்கிய ஊர்கள் கிட்டத்தட்ட 30 முதல் 40 கிமீகளுக்குள் இருக்கின்றன என்றும் சொல்லலாம். தஞ்சை, நாகை, திருவாரூர், குடந்தை, பட்டுக்கோட்டை போன்ற ஊர்கள் அருகில் உள்ளன.

“கோயில் பாதி; குளம் பாதி”...... என்ற பழமொழிக்கு சொந்தமான ஊர் மன்னார்குடிதான்.

குடி’ என்றால் கன்னடத்திலும், தெலுங்கிலும் கோயில் என்று அர்த்தம். இங்கே மன்னராகிய இராஜகோபாலசுவாமி குடியிருப்பதால் ‘மன்னார்குடி’ என்ற பெயர் வந்தது.

இங்கிருந்து சற்று தூரத்தில் தீர்த்தக்குளம் இருக்கிறது. கிருஷ்ணனின் தரிசனம் வேண்டிய முனிவர்கள் தவமிருந்த குளம் இது. இதனை யமுனை நதியாகவே கருதுவதால், "ஹரித்ரா நதி' என்றே அழைக்கிறார்கள். குளமாக இருந்தாலும் நதியின் பெயரில் அழைக்கப்படும் தீர்த்தம் இது. ஆனி பவுர்ணமியில் இந்த தீர்த்தத்தில் தெப்பத்திருவிழா நடக்கிறது.

இது தவிர, செண்பகாரண்யம், குலோத்துங்க சோழவிண்ணகரம், வாசுதேவபுரி.... என பல பெயர்கள் உண்டு.

மன்னார்குடி முக்கிய நகரங்களுக்கு (சென்னை, கோயம்புத்தூர், திருப்பதி, மானாமதுரை, மயிலாடுதுறை) நேரடியாக ரயில்கள் மூலம் இணைக்கப்பட்டுள்ளது. அருகில் திருச்சிராப்பள்ளி விமான நிலையம் மற்றும் காரைக்கால் துறைமுகம் உள்ளது.

answered Jul 9, 2013 by parthiban (15,410 points)
edited Jul 9, 2013 by parthiban
+2 votes

எங்க ஊர் வந்தவாசி , இது ஒரு நகராட்சி இதை சுற்றி உள்ள ஊர்களில் விவசாயம் அதிகமாக செய்யப்படுகிறது மற்றும் கோரை பாய் நெய்யும் தொழில் பிரபலமானது. வந்தவாசியை சுற்றி அழகிய கிராமங்கள் உள்ளன. இது ஒரு மக்களவை தொகுதி இதில் 6 சட்டமன்ற தொகுதிகள் உள்ளடக்கம் ( திருவண்ணாமலை , போளூர் , வந்தவாசி , பெரணமல்லூர் , மேல்மலையனுர் , செஞ்சி ) . இங்கு பதினெட்டாம் நூற்றாண்டில் பிரான்ஸ் நாட்டிற்கும் பிரிட்டன் நாட்டிற்கும் இடையே ஆசியாவை கைப்பற்றும் முயற்சியில் போர் நடந்தது. அப்போது மூன்றாவது கர்நாடக போர் என்ற பெயரில் ஏழு ஆண்டுகள் தொடர்ந்து போர் நடந்து வந்தது. இந்த போர் 1756 முதல் 1763 வரை நடைபெற்றது. இதில் 1760 ஆம் ஆண்டு வந்தவாசி கோட்டையை கைப்பற்ற இரு நாடுகளும் மோதிக்கொண்டன. இந்த போரில் பிரிட்டன் நாட்டைச் சேர்ந்த அயர் கூட் தலைமையிலான படை பிரான்சு நாட்டை சேர்ந்த ஜெனரல் லால்லி தலைமையிலான படையை தோற்கடித்தது. இந்த வெற்றி பிரிட்டன் நாட்டின் மாபெரும் வெற்றிக்கு வழி வகுத்தது.

வந்தவாசிக்கு அருகில் வெண்குன்றம் என்ற கிராமத்தில் ஒரு மலை உள்ளது இதில் கார்த்திகை தீபத்தின் போது மக்கள் கூட்டம் கூட்டமாக வந்து மலையில் எழுந்தருளியிருக்கும் அருணகிரி நாதரை தரிசனம் செய்து விட்டு செல்வார்கள். குழந்தைகளுக்கு நீண்ட நாள் மரு போன்ற தோல் சார்ந்த வியாதிகளுக்கு இந்த மலையில் உள்ள சுனையில் (தண்ணீர் தேங்கி இருக்கும் ஒரு இடம் ) உப்பு & மிளகு போட்டால் தோல் சார்ந்த வியாதிகள் நீங்கி விடும் [நானும் செய்திருக்கிறேன் எனக்கும் சரியாகிவிட்டது ]. இந்த மலையில் படிகள் சரியாக இருக்காது எனவே ட்ரக்கிங் போலவே இருக்கும் . அது ஒரு நல்ல அனுபவம்.
வந்தவாசி ஈஸ்வரன் கோவிலுக்கு ஒரு தனி சிறப்பும் உண்டு. மழை காலங்களில் இந்த கோவில் முழுதும் தண்ணீரால் நிரம்பி விடும். மூலவர் ஜலகண்டீச்வறரை தொடும் அளவிற்கு நீர் ஊற்றெடுத்து தேங்கும். இது எவ்வளவு உயரம் தேங்கும் என்றால் ஒரு மனிதரின் இடுப்பு அளவிற்கு என்றும் கூறலாம். இவ்வாறு ஏன் அந்த கால கட்டத்தில் அமைக்கப் பட்டது என்றால் "ஈஸ்வரர் கோபத்தில் நெற்றிக்கண் திறந்து பார்க்கும் பொது மிகுந்த உஷ்ணமாக இருக்கும். அதனை குளிர்விக்க தண்ணீருக்குள் தவம் புரிவார் ஈஸ்வரர். அதனால் தான் அவருக்கு ஜலகண்டீஸ்வரர் என பெயரும் வந்தது" என்று கூறுவர். ஆகவே தான் ஈஸ்வரர் தண்ணீரில் மூழ்கும் படி இவ்வாறு வடிவமைத்து உள்ளனர். ஆனால் பக்தர்கள் உள்ளே செல்ல அவதி படுவதால் தற்போது கட்டமைப்புகளில் மாற்றம் செய்து தண்ணீர் உள்ளே தேங்காத வண்ணம் அமைத்துள்ளனர்.
வந்தவாசிக்கு அருகில் தென்னாங்கூரில் உள்ள பாண்டுரங்கர் கோவிலும் பார்க்கத்தகுந்தது.தென்னாங்கூர் கோவில் மற்ற கோவில்களை போல சாதாரணமாக இல்லாமல் பூரி ஜகன்னாதர் கோவிலை போன்ற கோபுர வடிவம் கொண்ட கோவில் ஆகும். மேலும் சிறந்த தொழில்நுட்ப வேலை பாடுகளுடன் அமைக்கப் பட்ட பைபர் கிளாஸ் பைண்டிங் முறையில் உட்கட்டமைப்பில் உள்ள படங்கள் வடிவமைக்கப் பட்டு உள்ளன. பிரமாண்டமான வெள்ளிக் கதவுகள் மூலவரின் சன்னதியில் அமைத்துள்ளனர். இங்கிருக்கும் பெருமாள் கடவுளுக்கு திருப்பதி தேவஸ்தான முறையில் அலங்காரங்களும், ஆராதனைகளும் செய்ய படுகின்றன.
வந்தவாசி கோட்டையிலிருந்து செஞ்சிக் கோட்டை வரை சுரங்கப் பாதை இருந்ததாக வரலாறு கூறுகிறது. இந்த சுரங்கப் பாதைகள் காலப் போக்கில் சரியான பராமரிப்பு இல்லாத காரணத்தால் அழிந்து விட்டதாக கூற படுகிறது. தற்போது கோட்டையில் மிஞ்சி இருப்பது சில பகுதிகள் மட்டுமே. மக்கள் ஆக்கிரமிப்பால் பெரும்பாலான கோட்டை அழிந்துவிட்டது. ஆனால் இப்போதும் கோட்டைக்குள் நுழைந்தால் பழங்காலத்து கத்தி, போர் உடைகள், குதிரை கடிவாளம், பீரங்கி குண்டுகள் போன்ற ஏராளமான பொருட்கள் கிடைப்பதாக கூறப் படுகின்றது.

இந்த கோவில் அமைவிடம் வந்தவாசி கோட்டையின் நுழைவு வாயில் ஆகும். வந்தவாசி கோட்டை மிகவும் சேதம் அடைந்துவிட்ட நிலையிலும் இந்த வீர ஆஞ்சநேயர் கோவில் மட்டும் பாதுகாக்கப் பட்டு வருகிறது. இந்த கோவில் பக்கத்தில் பழங்காலத்தில் மன்னர்களாலும் பிரிட்டனாலும் உபயோகிக்கப் பட்ட பீரங்கி ஒன்றும் உள்ளது. கோவிலும் பீரங்கியும் தற்போது அறநிலையத் துறையால் பாதுகாக்கப் பட்டு வருகிறது.

answered Jul 9, 2013 by varul (1,758 points)
+3 votes

எனது ஊர் காட்டுமன்னார்கோவில்/காட்டுமன்னார்கோயில், இது ஒரு வைணவத் தலமாகும். நாலாயிர திவ்விய பிரபந்தத்தை தொகுத்த வைணவப் பெரியார் நாதமுனிகள் பிறந்த ஊர். அவரது பேரனும், ஸ்ரீ ராமானுஜரின் ஆச்சாரியரும் ஆன ஆளவந்தார் ( யமுனைத் துறைவர்) அவதரித்த தலம். வைணவர்கள் இதனை வீரநாராயணபுரம் எனக்குறிப்பிடுவர். இது கல்வெட்டுக்களில் வீரநாராயண சதுர்வேதி மங்கலம் எனக் குறிக்கப்பட்டுள்ளது. வீராநாராயணன் என்ற விருதுப் பெயர் கொண்ட முதலாம் பராந்தகனால் இவ்வூர் அமைக்கப்பட்டது என்பர். இவ்வூர் சிதம்பரத்தில் இருந்து 26 கி.மீ. தூரத்திலும், கங்கை கொண்ட சோழபுரத்திலிருந்து 13 கி.மீ தூரத்திலும், சென்னயிலிருந்து 220 கி.மீ. தொலைவிலும் அமைந்துள்ளது. காட்டுமன்னார்கோயில், காட்டுமன்னார்குடி என்றும் அழைக்கப்படும்,

காட்டுமன்னார்கோயில், திருமந்திரத்தை இயற்றிய திருமூலர் அவதரித்த ஊரும் ஆகும். திருமந்திரம் 3000 பாடல்களைக் கொண்டது. இதனைச் சைவத் திருமுறைகள் பன்னிரண்டினுள் பத்தாவது திருமுறையாய்த் தொகுத்துள்ளனர். இவ்வூரிலிருந்து 2 கி.மீ. தூரத்தில் திருமூலஸ்தானம் என்ற ஊர் அமைந்துள்ளது.

காட்டுமன்னார்கோயில் நகரத்திற்கு அருகில் வீராணம் ஏரி உள்ளது. காவிரியின் கொள்ளிடத்தில் உள்ள அணைக்கரை என்னும் கீழ்அணையிலிருந்து வடவாறு (வடவர் கால்வாய்) வழியாக இவ்வேரிக்கு நீர் வருகிறது. அமரர் கல்கி எழுதிய பொன்னியின் செல்வன் என்ற புதினம் இவ்வேரியின் கரையிலிருந்து தொடங்குகிறது. அப்புதினத்தில் இவ்வேரி 'வீரநாராயண ஏரி' என குறிப்பிடப்பட்டிருக்கும்.

காட்டுமன்னார்கோயில் வட்டம் , கடலூர் மாவட்டத்தில் உள்ள ஏழு வட்டங்களில் ஒன்றாகும். இந்த வட்டத்தின் கீழ் 161 கிராமங்கள் உள்ளன.

answered Jul 9, 2013 by Senthilkumar (2,426 points)
+6 votes

தமிழ்நாட்டின் தலைநகரம் !...
தமிழ் பேசும் பெருநகரம் !...
தப்பி பிழைக்க வந்தவர்களை
தப்பாமல் பிழைக்க வைக்கும் நகரம்!...
என்னற்ற கோவில்கள் !..
எங்கும் பூங்காக்கள் !..
அழகிய பறவைகள் !..
வானிலிருந்து பார்ப்பவருக்கு - தேனீ
கூட்டம் போல் எங்கும் எப்பொழுதும்
மக்கள் நடமாட்டங்கள் !...
பல வீரர்களின் பிறப்பிடம் !...
சில வில்லன்களின் இறப்பிடம் !...
உலகின் 2ஆம் சிறந்த ,கடற்கரை அழகை காண கண்கள் பத்தாது !....
காந்தி மண்டபம் என் நகரின் காதல் சின்னம் !...
பல கல்லூரி சாலைகள் நண்பர்களின் சின்னம் !..
சொன்ன காதல்களையும் , சொல்லாத காதல்களையும்
சேர்த்து வைக்கும் நகரம்.....

இத்தனை எழில்மிகு சென்னையில் சிறிய இடம் க்ரோம்பேட் :

பல சினிமாகாரர்கள் படபிடிப்பு தளம் என் க்ரோம்பேட் MIT மேம்பாலம் ...
தெருவுக்கு ஒரு பாட்டி வைத்தியம்..
திரும்பிய இடமெல்லாம் பள்ளிகள் ..
தினந்தோறும் வீட்டு வாசலில் வந்து நிற்கும் பசுமாடுகள் ....
பரபரப்பான போக்குவரத்து நெரிசல்கள்...
பதறாமல் வேலை செய்யும் என் மக்கள்..
விதி எங்கும் கோவில்கள் ,
விடிந்தவுடன் காதில் விழும் கோவில் மணி ஓசைகள்...
சண்டை போடும் உறவுகள் மத்தியில் ...
சலிக்காமல் "சாப்பிட்டயா" என்று கேட்கும் என் பக்கத்துக்கு வீட்டு உபசரிப்புகள்..
எல்லா பண்டிகைகளையும் ஒன்றாக சேர்ந்து கொண்டாடும் அடுக்கு மாடி குடியிருப்பு நண்பர்கள்....
என் சென்னையை போல ஒரு ஊர் வருமா....

answered Jul 9, 2013 by Pradhi (1,854 points)
+7 votes

உடுமலைபேட்டை எனது ஊர். உடுமலை என்று உரிமையோடு அழைக்கப்படுகின்ற நமது ஊரின் சிறப்பே அதன் சீதோஷ்ணம்தான். ஏழைகளின் ஊட்டி என்று ஆங்கிலேயர்களால் புகழப்பட்ட உடுமலை நகரில் மிக அதிகமான நூற்பாலைகள் நல்ல முறையில் சில காலம் முன்புவரை இயங்கி வந்தன. ஆனால் இப்போதோ பெருங்காயம் வைத்திருந்த டப்பாவில் மீதமிருக்கும் வாசனைபோல் வெகு சில ஆலைகளே உள்ளன .
வெளி ஊர்களில் இருந்து இங்கு வேலை,வியாபாரம் போன்ற காரணங்களால் வந்த பலரும் தங்கள் பணி ஓய்வுக்குப்பின் தங்க, வீடுகள் கட்டி இங்கேயே குடியேறி உள்ளார்கள் என்பதில் இருந்தே உடுமலையின் சிறப்பை புரிந்து கொள்ளலாம்.
உடுமலை மத நல்லிணக்கத்துக்கு முன்னோடியான ஊர் என்றால் அது மிகைஅல்ல. ஊருக்கு நடுவே( தளி ரோடு-இல்) மிக மிக அருகிலேயே மசூதி, கிறிஸ்துவ தேவாலயம், விநாயகர் கோயில் ஆகிய மூன்றும் அமைந்திருப்பதே இதற்கு சான்று. மாரியம்மன் கோயில் தேரோட்டம், கிறிஸ்துமஸ் கொண்டாட்டம், ரம்ஜான் பண்டிகை ஆகிய மூன்றின்போழுதும் ஊரே கோலாகலமாய் இருக்கும்.
தமிழகத்திற்கு மந்திரிகளை (திரு.சாதிக் பாஷா, திரு. குழந்தைவேல், திரு.சி..சண்முகவேல் ) அளித்து பெருமை அடைந்த உடுமலை சட்ட மன்ற தொகுதி, இப்போதுள்ள சட்ட மன்ற உறுப்பினர் (திரு. வே.ஜெயராமன் அவர்கள் ) தமிழக துணை சபா நாயகர் ஆக வுள்ளது மேலும் பெருமை அடைகிறது.
நல்ல தரமான கல்வி அளிப்பதில் உடுமலை என்றுமே முன்னுரிமை கொடுத்து
வருவதற்கு இங்குள்ள தலை சிறந்த பள்ளிகளே சாட்சி. உதாரணமாக ஸ்டெல்லா மேரிஸ் பள்ளி, அரசு உயர்நிலை பள்ளிகள் (ஆண் /பெண் ) இரண்டு, கன்னிகா பரமேஸ்வரி பள்ளி,ஆர்.ஜி எம்.பள்ளி, யு.கே .பீ .எம். பள்ளி, ஆக்ஸ்போர்ட் பள்ளி, விவேகானந்தா வித்யாலயா , ஸ்ரீனிவாச வித்யாலயா என சொல்லிக்கொண்டே போகலாம். அதே போல கல்லூரிகளும் உள்ளன.
குதிரை பந்தயத்தில் எல்லா குதிரைகளும் நன்றாக ஓடினாலும், வெற்றிக் கோட்டில் மூக்கை நீட்டி வெற்றிபெறும் குதிரைபோல, ஸ்ரீனிவாச வித்யாலயா தனது பங்குக்கு சாதித்துக்கொண்டே உள்ளது. இந்தியாவின் பல பாகங்களிலும் மட்டும் இன்றி உலகின் பல நாடுகளிலும் இந்த பள்ளியின் மாணவ மாணவியர் உயர்ந்த நிலையில் உள்ளதே இதற்கு சான்று.
மலைகளால் சூழப்பட்ட உடுமலைக்கு மேலும் அழகு சேர்ப்பது அமராவதி மற்றும் திருமூர்த்தி அணைகள். உடுமலையின் குடிநீர் தேவையை , திருமூர்த்தி அணை தனது மிக மிக சுவையான நீரின்மூல்யமாக தீர்க்கிறது.
வின்ட் மில்ஸ் எனப்படும் காற்றாடிகளை நகரை சுற்றியும் நீங்கள் பார்க்கலாம். அவைகளின் உயரத்தையும் தாண்டி உடுமலை மற்றும் அதன் சுற்றுப்புறத்திலும் வீடுகளும் வீட்டு மனைகளும் தங்களது விலையில்
விண்ணை முட்டி உள்ளன என்பது ஒரு சோகமான உணர்வுதான் இங்கு பலருக்கும்.

answered Jul 10, 2013 by Rangasamy Sundaram (66 points)
+5 votes

சோறுடைத்த சோழநாடு எங்களோட ஊரு! தஞ்சைதானே அதனுடைய தலைநகரம் பாரு ! என் பாட்டன் ராஜராஜன் ஆண்டு வாழ்ந்த ஊரு ! வீர வாளோடு அவன் நிற்கும் அழகை நீயும் பாரு ! எழில் கொஞ்சும் சிற்ப கலையை உலகிற்களித்த ஊரு ! கம்பீரமாய் எழுந்து நிற்கும் ராஜகோபுரம் பாரு ! வளைந்து நெளிந்து அழகாய் காவேரி பாயும் ஊரு ! அதன் கரையெங்கும் பசுமையான புல்வெளிகள் பாரு ! மூணு போகம் சாகுபடியில் முன்னின்ற ஊரு ! இப்ப ஒரு போகம் தண்ணிக்கே தவிக்கும் நிலையை பாரு! கன்னடத்து ராசா எங்களை கருணையா கொஞ்சம் பாரு!

answered Jul 11, 2013 by karubaskaran (74 points)
+2 votes

அருப்புக்கோட்டை வரலாறு
தமிழகத்தின் மிகவும் பழம்பெருமை வாய்ந்த சிறப்புமிக்கது அருப்புக்கோட்டை நகரமாகும்.விருதுநகர் மாவட்டத்தில் முதல்நிலை ஊராட்சியாகத் திகழும் அருப்புக்கோட்டை நகரின் அமைவிடம் 9.520 N, 78.10 E ஆகும். கடல்மட்டத்தில் இருந்து 318 அடி(சராசரியாக 97 மீட்டர்) உயரத்தில் இந்நகரம் அமைந்துள்ளது. அருப்புக்கோட்டை நகர் குறித்து பல்வேறு பழமையான தகவல்களை கல்வெட்டு ஆராய்ச்சியாளர்கள் தெரிவித்துள்ளனர்.

நம்முடைய நகரின் சொக்கலிங்கபுரம் பகுதியின் அமைந்துள்ள ஸ்ரீமீனாட்சி சொக்கநாதர் திருக்கோயிலில், சுமார் 800 ஆண்டுகளுக்கு முற்பட்ட கல்வெட்டுகள் இடம் பெற்றுள்ளன. இக்கல்வெட்டுக்களில்‘’செங்காட்டிருக்கை’’எனஅருப்புக்கோட்டைநகரம் குறிப்பிடப்பட்டுள்ளது. மேலும் “இடத்துவளி“ என இன்னொரு பகுதியும் இருந்தது, என்ற குறிப்பும் அக்கல்வெட்டில் உள்ளது.இவ்விரண்டு பகுதிகளையும் சேர்த்து செங்காட்டிருக்கை இடத்துவளி என்று அழைக்கப்பட்டதாகவும் கல்வெட்டு கூறுகிறது.

இன்றும் நகரின் வடகிழக்கில் உள்ள “செங்காட்டூரணி“ என்ற ஊரணிகுளம் நம் நகரின் பழைய பெயரை நினைவூட்டி நிற்பது இங்கு குறிப்பிடத்தக்கது.

மேலும் பல வணிகத் தெருக்கள் பெருந்தெரு என்ற பெயரில் இருந்துள்ளதாக அக்கல்வெட்டு குறிப்பிடுகிறது.

1.விக்கரமபாண்டியன் பெருந்தெரு 2.வீரபாண்டியன் பெருந்தெரு 3.பழிவிலங்கிப் பெருந்தெரு 4.சீவல்லவப் பெருந்தெருவான தேசியாசிரியப் பட்டணம் ஆகியன நகரில் இருந்த சில பெருந்தெருக்கள் என்று கல்வெட்டில் பொறிக்கப்பட்டுள்ளது.

இலுப்பையூர், சிறுமணக்குளம், பெரியமணக்குளம், பெருநாங்கூர், பூங்கால், காரையிருக்கை வெண்மில் வாழையூரான பூலோக சுந்தர நல்லூர் ஆகிய சிற்றூர்கள் அருப்புக்கோட்டை நகரைச் சுற்றி இருந்ததாகக் கல்வெட்டு அறிவிக்கிறது.

சுமார் 400 வருடங்களுக்கு முன் மதுரையை ஆண்ட வீரப்பநாயக்கர் ஒரு கோட்டையை இங்கு கட்டினார். அதனை ‘அரவக்கோட்டை’ என்று அப்பொழுது அழைத்து வந்தனர். அந்த‘’அரவக்கோட்டையே’’ காலப்போக்கில் ‘’அருப்புக்கோட்டையாக’’ மாறியது என்று தொல்பொருள் ஆய்வுத்துறையின் அதிகாரப்பூர்வ வட்டாரங்கள் தெரிவிக்கின்றன

அருப்புக்கோட்டையைச் சுற்றி மல்லிகை பூந்தோட்டங்கள் கோட்டை போன்று அமைந்திருந்ததால் அரும்புக்கோட்டை என்று முன்னொரு காலத்தில் நம்நகரை அழைத்தனர். காலப்போக்கில் அரும்புக்கோட்டை என்ற பெயர் மருவி அருப்புக்கோட்டையாக மாறியது என செவிவழிச் செய்தியாக கூறப்படுவதும் உண்டு.

2001 மக்கள்தொகை கணக்கெடுப்பின் படி அருப்புக்கோட்டைநகராட்சியில் 83,999பேர் வசிக்கின்றனர். இவர்களில் 41,959 பேர் ஆண்கள். 42,040 பேர் பெண்கள். இவர்களில் ஆறு வயதிற்குட்பட்டோர்களின் எண்ணிக்கை 7,834. இவர்களில் ஆண்கள் 3978. பெண்கள் 3856. நகரில்கல்வியறிவு பெற்றவர்களின் எண்ணிக்கை 66,460 பேர். இவர்களில் 35,783 பேர் ஆண்கள். 30,677 பேர் பெண்கள்.

answered Aug 9, 2013 by Ramesh Rambi (3,496 points)
...